Kunan 12 punchaw diciembre killapim TV Perúpi Ñuqanchik qichwa rimaypi willakuywan lluqsimusqanta raymichachkan. 8 watatam 2016 watapi paqarimusqan pachamanta hayparqun. Chaynapim raymichaypi tarikun. Willakuyqa qallarisqan pachaqa Clodomiro Landeowan Marisol Mena willakuqkuna willarimusqaku.

Ñuqanchik willakuypa 8 wata haypayninqa ancha hantun riqsikuymi, waqaychaymi kachkan. Paykunapa rurayninkuqa (qichwa rimaypi willakuykuna willakuy) llapa qichwa rimaqkunata, aymara rimaqkunata, yunkapi rimaykunapi rimaqkunapata kawsaninkuta kutiykachin. Hinallataq ñawpaman ñankaykachin. Unay pacha sarunchasqa, millasqa, chiqnisqa, huklawman wischusqa kasqankutam tukurichin hinallataq mana runahina qawasqa kasqankuta chinkachin. Chaynallataqmi kaypi kasqankuta, kawsasqankuta tukuy suyukunaman chiqirichinku. Kaykunawanmi qichwa rimaqkuna, llaqtapi qichwa rimay pinqakuyninkuta qipaman chuqanku. Kunanqa mana llumpay pinqakuywanmi rimanchik. Qipa hamuq warmakunapas, huk rimaykuna rimaqkunapas qichwa rimaymanmi hapipakuykunku. Ñuqanchik willakuyqa qichwa rimaqkunatam ñawpa taytamanchikkunapa rimayninkuman churaykunwanchik, chaynallataq rimayninchikta kancharichin.

Manam hanaypi nisqallaytachu Ñuqanchik willakuyqa ruran, qichwa rimaypi yachachiqkunata, takiqkunata, qillqaqkunata, siqi llimpiqkunata rurayninkuman minkarispankum llapa suyuman riqsichinku. Kay rurasqawanmi llapa qichwa rimaqkunata yanapan hinallataq qichwa rimayta sapinchachin. Qichwa rimaqkunapaqmi punkuhina Ñuqanchik willakuyqa. Ñuqanchik willakuyqa hukninchikmi, wakinchikhinam.

Paqarisqan pachamanta kunan pachakamaqa urqupi qasanta muyuq wayarahinam purirqunña. Kunanqa pachaqa achikyaypiwan chawpi punchawpim qichwa rimaypi willakuyqa lluqsimuchkan. Kimsa waynasipasmi qichwa rimay willakuq kachkanku. Paykunapim qichwa rimaypi willakuy takyasqa kanan tarikun, chaynallataq tayta Clodomiro Landeopa pusayninpi. Hinllataqmi wakin kamachikuqkunapi, yananpaqninkunapa makinkunpi ñawpa watakunam illarinan kachkan.

Hamuytapacha qillqasqa willakuypi qillqakunam punchawniykichikman hukllawakaykamuniku. Hatun kusikuymi qichwa rimaqkunapaq punchawniykichiqa. Urqu wayrahinayá kuchun kuchun, pampan pampan, urqun urqun qipawatakunaman chayariychik. Qamkunapaq hatun quchukuy kachun, chaynallataq wiña wiñay kawsay kachun.